ՀՀ դեսպան Վահրամ Կաժոյանի մասնակցությունը Լաոսի Ժողովրդական Ժողովրդավարական Հանրապետության Ազգային տոնի 48-ամյակին նվիրված պաշտոնական արարողությանն ու գալիք՝ 2024 թ. Ամանորի հանդիսավոր միջոցառմանը:

01 դեկտեմբերի, 2023

Ս.թ. դեկտեմբերի 1-ին Լաոսի ԺԺՀ-ում ՀՀ դեսպան Վահրամ Կաժոյանը Լաոսի Ժողովրդական Ժողովրդավարական Հանրապետության Ազգային Ժողովում մասնակցեց Լաոսի նախագահ, Լաոսի Ժողովրդական Հեղափոխական կուսակցության Գլխավոր քարտուղար Ն.Գ. Թոնգլուն Սիսուլիթի և տիկնոջ կողմից հրավիրված՝ Լաոսի Ժողովրդական Ժողովրդավարական Հանրապետության Ազգային տոնի 48-ամյակին նվիրված պաշտոնական արարողությանն ու գալիք՝ 2024 թ. Ամանորի հանդիսավոր միջոցառմանը:

Հանդիսությանը մասնակցում էին նաև Լաոսի Ժողովրդական Ժողովրդավարական Հանրապետության վարչապետ Ն.Գ. Սոնեսայ Սայֆանդոնը, Ազգային Ժողովի նախագահ Ն.Գ. Սայսոմֆոն Ֆոմվիհանը և փոխվարչապետ, արտաքին գործերի նախարար Ն.Գ. Սալեումսայ Կոմմասիթը ամուսինների հետ:

Հանդիսավոր արարողությանը մասնակցում էին Լաոսում հավատարմագրված երկրների դեսպաններն ու միջազգային կազմակերպությունների մշտական ներկայացուցիչներն՝ ամուսինների հետ:

Դիվանագիտական կորպուսի անունից ելույթով հանդես եկավ դիվանագիտական կորպուսի դուայեն՝ Լաոսում Թուրքիայի դեսպան՝ Օրհան Իշիկը: Ներկա դեսպանների անունից նա շնորհավորեց նախագահ Սիսուլիթին ու երկրի ղեկավարությանն՝ Ազգային տոնի առթիվ, ինչպես նաև ԼԺԺՀ ղեկավարությանն ու ժողովրդին՝ գալիք 2024 թվականի կապակցությամբ: Նա վստահություն հայտնեց, որ երկիրը կշարունակի արձանագրել տնտեսական վերելքը՝ ապահովելով բնակչության կենսամակարդակի բարձրացումը:

Այնուհետև ելույթով հանդես եկավ Լաոսի նախագահ Թոնգլուն Սիսուլիթը, ով ներկայացրեց երկրի նվաճումներն անկախության 48 տարիների ընթացքում, մասնավորաբար անդրադառնալով անցնող տարվա ձեռքբերումներին: Նա մեծապես կարևորեց Լաոս-Չինաստան երկաթգծի գործարկումն ու անխափան շահագործումը, որը կապել է Լաոսը տարածաշրջանի հիմնական երկաթուղային հաղորդակցության ուղիների հետ՝ Վիենտյանից մինչև Պեկին՝ դառնալով Լաոսի պատմության համար դարակազմիկ ու ռազմավարական ծրագիր:

Նախագահ Սիսուլիթը կարևորեց երկրի համար իրենց նախանշած կարևորագույն նպատակը՝ ՄԱԿ-ի ամենաքիչ զարգացած երկրների ցանկից 2026 թվականին դուրս գալը, նշելով որ այս ամենին անհնար կլինի հասնել և իրականացնել առանց միջազգային հանրության և բարեկամ երկրների աջակցության: Լաոսն անշեղորեն շարունակելու է հետամուտ լինել երկրի անկախության, խաղաղության բարեկամության ու համագործակցության իր քաղաքականությանը՝ նպաստելով միջազգային խաղաղությանն ու կայուն զարգացմանը:

Լաոսի նախագահը խոսեց 9-րդ հնգամյա պլանի մասին, որի ճշգրիտ կատարումը թույլ կտա Լաոսին դառնալ միջին եկամուտ ունեցող, այնուհետև նաև բարձր եկամուտ ունեցող երկիր:

Նախագահը խիստ կարևորեց գալիք՝ 2024 թվականին Լաոսի ASEAN-ում նախագահությունը և 2024 թվականը երկրում զբոսաշրջության տարի հռչակումը։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր